Punk-rock doinuekin girotu du boskote bergararrak herriko Venti Gastro Italia jatetxea. Azaroan zehar aurrera eramango den Movember ekimena –prostata eta barrabiletako minbiziaren gaineko sentsibilizazio ekimena– dela eta eskaini du kontzertua Laino Beltzak musika taldeak. Jendetza hurbildu da jatetxera eta kontzertuaz gozatzeko toki gutxi batzuk besterik ez dituzte utzi ikus-entzuleek. Kontzertua Movembergara taldeak antolatutako egitarauko ekintzetako bat da, eta, hori dela eta, sentsibilizazio ekimenean laguntzeko kamiseta, txapa edota zozketa-txartelak izan dituzte sarreran.
Hilabete osoko egitaraua
Movember mugimenduak azaroa osoan zehar irauten duenez, Movembergara taldeak hilabete osoko egitaraua antolatu du. Datozen asteetan Alex Muela ikertzailearen Suizidio jokabiaren prebentzioaren hainbat gako hitzaldia, spinning-rock saioa, bertso-saioa eta txiste-poteoa izango dituzte bergararrek.
