Boxeo jaialdi paregabea bizi izan zuten atzo, Bergarako pilotalekuan, Sorabox taldeak antolatuta. Bertan, hiru bergararren borrokek piztu zuten interesik handiena eta zaleak piztu egin ziren etxeko borrokalariak animatzeko. Frontoiko harmailak bete egin ziren, boxeoaz gozatzeko.
Ibon Muniategiandikoetxea izan zen ringera igo zen lehen bergararra, eta David Guerrero aurkari K.O. tekniko baten bidez garaitu zuen. Muniategiandikoetxeak Guerrerori gibelaldean ukabilkada eman zion, eta Napar Sustraiak taldeko borrokalariak hanka lurrera bota behar izan zuen.
Josu Zalakainek Adrian Romero izan zuen aurkari bergarako pilotalekuko ringean. Borroka nahiko parekatua izan zen, baina, azkenean, epaileek txartelak kontsultatu ostean, Bergarakoak irabazi zuen puntuetara.
Gaueko borrokaldi izarra Andoni Kortabarria bergararraren eta Asier Andreuren artekoa izan zen. Kortabarriak erakustaldia eman zuen 16 soken artean, eta bigarren roundean, Andreuk besoak altxatzen ez zituela ikusita, txokoan zeuden entrenatzaileek toalla jaurti zuten ringera. Horrela, garaipena etxeko borrokalariak eskuratu zuen.
