Aste honetan egin dute zerbitzuaren aurkezpena Ainhoa Lete Bergarako Udaleko ordezkariak eta herriko eragile ezberdinetako ordezkariek. Udaletik azaldu dutenez, etxeko langileen lan-esparruaren harira, zalantzak eta galderak sortzen dira herritarren artean eta langilek orientazio juridikoa behar izaten dute euren lan-arloko eskubide eta betebeharrak zeintzuk diren ezagutzeko. Era berean, adierazi dute etxeko-langilea kontratatu nahi duten herritarrek ere zalantzak izaten dituztela izapideak modu zuzenean egiteko.
Leteren hitzetan, zaintza lanak "askotan", justizia sozialetik kanpo gelditzen den errealitatean gertatzen dira: "Batetik, lan hauen banaketa, lan ordaindu eta ez-ordainduetan, erabat desorekatua delako genero, klase, arraza, jatorri eta adinaren araberako arrakaletan oinarrituta; gainera, lan hauen aitortza sozial, politiko eta ekonomiko urria dela eta, lan hauek egiten dituzten pertsonen bizitzetan prekarizazioa dakarrelako".
Horregatik, zerbitzu honen bitartez etxeko langileei euren eskubideei buruzko eta betebeharrei informazioa emago zaie. Kontratatzaileei, berriz, euren betebeharren informazioa eman –kontratuak nola egin edota administrazioaren aurrean dituzten obligazioak zeintzuk diren argitu– nahiz langileen eskubideen azalpenak emango zaizkie.
Zerbitzua hamabostean behin
Azaroaren 15ean jarriko da martxan zerbitzua eta hamabostean behin eskainiko da; Ehunduk Mazpildi kalea 2 zenbakian duen lokalean. Zerbitzua erabiltzeko hitzordua aurrez eskatu beharko da BAZen.