Ordenantza fiskalei begira, EAJk proposatzen du tasak orokorrean %2,6 eta kiroldegiko abonua %5 igotzea. EH Bilduk proposatzen duen %4ko igoera gehiegizkoa dela uste dute jeltzaleek: "Gaur egungo egoeran, Udalak bere gain hartu behar du igoeraren zati bat; ez da bidezkoa osotasunean herritarren gain uztea. KPIaren igoera herritarron eta Udalaren artean banatzea proposatzen dugu".
Kiroldegiko tasa %10 igotzeko EH Bilduren erabakia "onartezina" dela diote: "Kostuaren –argia, gasa, soldatak...– igoera jarri dute argudiotzat, eta, aurre egiteko, tasen igoera proposatzen du zuzenean. Tasak igotzeaz gain, gastuen kudeaketa zorrotza egin behar da; gastua kontrolatu beharra dago". EAJk "azken unera arte" jarraituko du lanean, betiere kiroldegiko tasaren %10eko igoera onartuko ez dutela argi utzita.
