Bergarako San Juan auzoko ermitak Mundo Divino bikotearen kontzertua hartuko du bihar arratsaldeko zortzietatik aurrera. Maria del Tango abeslariak eta Carlos El Calimbero gitarra-joleak osatzen dute flamenko talde hau, baina biharko emanaldian hiru musikari arituko dira; izan ere, aurreratu dutenez, Juan Carlos Aracil zeharkako txirula-jolearen kolaborazio berezia izango dute.
Konposatutako abestietan esperantza mezuak bidaltzen dituzte. Cadizen sortutako taldea da, eta bikotearen bi belaunaldiak elkartzen dituzte haien musikak eta poesiak. Esan bezala, flamenkoa dute oinarri eta inspirazio iturri, baina rock andaluziarretik ere edaten dute. Singleak kaleratu ohi dituzte eta azkena duela zazpi hilabete estreinatu zuten: Andaluzsí. Disko bakarra dute eta 2021ean ikusi zuen argia; En el mismo reloj deitzen da.