"Palestina aurrera. Israel genozida" irakur zitekeen pankartaren inguruan, borobil bat sortuz, egin zuten atzo iluntzean Bergarako plazan Palestinari babesa adierazteko elkarretaratzea. Palestinaren aldeko oihuak entzun ziren hizkuntza ezberdinetan, "Palestina askatu" eta "Israel genozida" oihuekin batera. Palestinako banderez gain, Sahararen askatasuna eskatzen zuen bat eta Marokoko beste bat ere baziren kale bilkuran.
Ordu erdi iraun zuen elkarretaratzeak eta amaieran jakinarazi zuten zapatuan Donostian egingo den manifestaziora joateko autobusa antolatu dutela. 15:30ean aterako da autobus geltokitik eta 20:00etan bueltatu. Izenak Pol Pol edo Arrano tabernetan eman behar dira. Autobusa doan izaten saiatuko direla ere gaineratu zuen, "dirua inorendako oztopo ez izateko". Gernika-Palestina deialdi herritarrak antolatu duen manifestazioa 17:30ean abiatuko da Antiguako tuneletik.