Hiru Hiriburuak txapelketaren finala jokatu dute Aldai-Bergara eta Garai-Zabala bikoteek gaur eguerdian Bizkaia pilotalekuan. Azken unerarte borrokatu dute Garaik eta Zabalak baina txapela Aldaik eta Bergarak jantzi dute.
Ezin hobeto hasi dute partidua Arrate Bergarak eta haren bikote Amaia Aldaik; erritmo bizia ezarri dute eta airez, gantxoz edota dejadaz egindako tantoak eskaini dizkiete gorriek ikusleei. 15 eta 6 izan dira aurretik Aldai eta Bergara, eta bazirudien nahiko final lasaia izango zela haientzat. Alabaina, Garaik eta Zabalak osatutako bikotea berpiztu egin da eta, batzuek huts egindakoak eta beste batzuek asmatutakoak aprobetxatuz, markagailuan 15 eta 14koa ezartzea lortu dute. Aldai eta Bergara partidatik kanpo zeudela zirudien, baina horrelako momentuetan erakusten dute adorea txapeldunek, eta hori bera egin dute haiek. Partida hasierako erritmoa ezartzea lortu dute berriro ere eta, partida ixtea kosta egin bazaie ere, lortu dute hogeita bigarren tantora iristea.