San Joxepe elkarteko presidente Nestor Inurrieta eta Duintasunako kide Maite Guridi izan dira Adineko Pertsonen Nazioarteko Eguna dela eta Bergaran gaur eguerdian egindako ekitaldiari hasiera eman dion adierazpena irakurri dutenak.
Hala, nabarmendu dute %24 baino gehiago direla Bergaran 60 urtetik gora dituzten herritarrak, eta gaineratu, azken urtean "larriagotu" egin dela adinekoentzako arreta. Zentzu horretan., Osakidetzaren eskaintzan "atzerakada" egon dela adierazi eta osasun "publikoa eta kalitatezkoa" eskatu dute, baita zerbitzu soziosanitario eta publiko "onak" ere. Egungo gutxieneko pentsioak 1.080 eurora arte osatzeko eta pobreziaren eta genero arrakalaren aurkako politika "eraginkorrak" ere eskatu dizkiete Estatuko eta autonomia erkidegoetako erakundeei.
Zaintzaren bueltako aldarrikapenak
Aurten baina, zaintzaren gaiari begira nahi izan diote bereziki, eta pertsona guztien eskubidea dela argudiatuta, hainbat eskubide aldarrikatu dituzte: beharra duten pertsonen autonomia bermatuko duen kalitatezko zaintza zerbitzua; etxeko zaintza profesionalizatuak, integralak eta kudeaketa publikokoak; zaintzaren kalitatea bermatuko duten egoitzak, eguneko zentroak eta bestelakok; hurbileko zerbitzuak familien eta erabiltzaileen parte-hartzearekin; eta gizonen eta emakumeen erantzunkidetasuna zaintza-lanetan.
Era berean, Adineko Pertsonen Nazioarteko Eguna egun bakar batean ez geratzea aldarrikatu dute: "Gipuzkoako Foru Aldundiak, Eusko Jaurlaritzak eta Udalak denbora guztian kontuan har dezatela nahi dugu".