Bizikleta Astea dela eta, Foru Aldundiko Mugikortasun, Turismo eta Lurralde Antolamenduko departamentuak bizikleta erabiltzera gonbidatu gura ditu herritarrak. Horretarako, Mugi txartel pertsonalizatua erakusten dutenei bizikleta doan berrikusi eta prestatuko diete. Bihar, irailak 22, izango da hori, 16:00etatik 20:00etara bitartean, San Martin plazan egongo den kamoi-tailerrean.
Ekimenarekin bat egiten dutenek, gainera, bi bizikletaren zozketan parte hartzeko aukera izango dute, baita bizikleta materiala erosteko 50 euroko bi bonuren zozketan ere. Mugi txartelerako 20 euroko 60 karga ere zozkatuko dituzte, Gipuzkoako Garraioaren Lurralde Agintaritzarekin (GGLA) lankidetzan.
Azahara Dominguez, Mugikortasuneko foru diputatuak, mugikortasun aktibo eta jasangarria sustatzearen alde egin du: "Gipuzkoak Europako Mugikortasunaren Astearekin bat egiten du, herritar guztion onura ekarriko duten helburu komunak lortzeko bidean. Kontua da mugikortasun aktibo eta jasangarria sustatzea, lehentasuna emanda bizikleta eta garraio publikoa erabiltzeari eta ahal den neurrian oinez ibiltzeari".
