Duela astebete ireki zituen ateak Debagoiena mailako Ilatargi astronomia elkartearen Unibertsoari begirada; unibertsoko mirariak kameratik ikusita erakusketak. Argazkilaritza munduan dabiltzan elkarteko kideek urteetan zehar ateratako argazkiek osatzen dute bilduma eta horietan daude jasota zeruarekin zerikusia duten gai ezberdinak: astroak, garaiko zeruak... Erakusketarekin Debagoienean astronomia elkarte bat dagoela ikusarazi nahi dute, baita jendea euren ekintzetan parte hartzera animatu ere: "Argazkilaritza munduan sartuta dagoena eta gaueko argazkilaritzari buruzko interesa duenak posible du gurekin kontaktuan jarri eta egiten diren behaketa eta halako saioetan parte hartzea".
Hilaren 24ra ikus daiteke Aroztegin, martitzenetik egubakoitzera 18:00-20:30, zapatuan 12:00- 14:00 eta 18:00-20:30 eta domeka nahiz jaiegunetan 12:00-14:00.
