Asentzio, Azkuneta, Errekaldea, Goimendi, Angiozar erdigunea –Kalea–, Mainddao, Parteitti eta Zabaletamendi auzoetako bizilagunak zeuden deituta gaur botoa ematera. %55eko parte hartzeaz, 138 lagunek eman dute botoa. 48k eman diote Mila Elortzari alkate izateko babesa.
Angiozarko bailaran udal hauteskunde urtean erabakitzen dute Batzar berria, San Juan egunaren hurrengo domekan. Ez da hautagairik egoten, 18 urtetik gorako edonork eman diezaioke botoa edonori, alkate edo batzarkide izateko. Mila Elortzak lau legegintzaldi egin ditu Angiozarko alkatetzan, eta gehienek haren alde egin dute berriz.
Datorren eguenean batuko dira batzarkide berriak eta zaharrak. Bilera horretan batzar berria eratuko dute, hautetsiek ardura onartu ondoren. Elortzak adierazi duenez, "denen artean hitz egingo dute, ea bakoitzak ze konpromiso maila har dezakeen".
Alkate aldaketa ekitaldia sanmigeletako domekan egingo dute, irail bukaeran, ohiturari jarraituz.
