Badira urte batzuk Ndank Ndankeko lagunek Kulturartekotasuna modan izeneko proiektua abiarazi zutenetik, eta, moda desfilea egitekotan zirela (2020), pandemiak bertan behera utzi zituen asmo guztiak. Hala, zapatuan egingo dute lehenengoz desfilea, 17:30ean, Seminarixoan: "Moda bada beste erreminta bat kulturartekotasuna erakusteko, eta hori da desfilearen helburua. Hala, elkarteko kideek, senitartekoek, lagunek... egingo dituzte zapatuan modelo lanak", adierazi du Eli Domingezek, barre txiki batekin, badaki-eta oholtza gainean ederto pasako dutela.
Afrikako oihalekin apainduta hemengo jantziekin igoko dira bergararrak taula gainera: "Wax oihal koloretsuekin apaindutako jertse, kamiseta eta bestelako arropak erakutsiko ditugu. Eta moda desfilearen ondoren, Seminarixo kanpoan azoka solidarioa egingo dugu". Hala, moda desfilean hainbat eragilek hartuko dute esku, eta musika ere egongo da ekitaldia girotzeko.