Herri mailan geroz eta auzo gehiagotan festak antolatzen zituztela ikusita, asteburu honetan ospatu dira lehenengoz Ernai kaleko jaiak Bergaran. Giro ederrean aritu dira bertako familia gazteak, eta bi eguneko egitarauarekin gozatu ederra hartu du batek baino gehiagok. "Ernai kale berri bat izanda eta familia gazte asko haur txikiekin bizi denez, pentsatu genuen jaitxo bat egitea", diote antolatzaileek. Argi zeukaten Pentekosteen aurretik egin nahi zutela, eta "maiatzaren 1a jaieguna izanik, aukera gehiago ez geneukan", adierazi dute.
Festarako, Ernaitxo ikurra ere asmatu zuten, haien esanetan, kalearekin zerikusia duen animaliatxoa; izan ere, halako "ugari" egoten dira etxeen azpian, azaldu zuten. Zapatuan, KrossFit erakustaldiarekin hasi zuten eguna, ondoren Txomingero bazkaria egin zuten eta arratsaldean buruhandiak ibili ziren umeen gozamenerako. Domekan, odoloste eta txorizo pintxoak salgai jarri zituzten, eta eguerdi aldera, Camdem Town-en eskutik, zumba saioa egon zen. 13:30ean egin zen sari banaketarekin eta boletoen zozketarekin amaitu ziren Ernai kaleko jaiak.