Bergaran dagoen Olaso Dorrea Fundazioa da George Lacombe euskaltzainaren ondarearen jabea, eta Euskaltzaindiarekin eta Gipuzkoako Foru Aldundiarekin elkarlanean egindako lanari esker, aurrerantzean, euskaltzaindia.eus webgunean egongo da eskuragarri artxibo osoa.
Guztira 18 funts daude eskuragarri eta 2.000 dokumentu inguru digitalizatu dituzte. "Euskararen historia eta Euskal Herriaren historia ezagutzeko dokumentu ezinbestekoak gordetzen ditu artxiboak, Besteak beste, Xahoren Kantutegia eta Louis Lucien Bonaparteren gutunak", azaldu du Euskaltzaindiaren Gipuzkoako ordezkari Miren Urkiak.
Olaso Dorrea Fundazioko patronatuko kide Maite Aristegik, fundazioarentzat "egun zoriontsua dela" azaldu du: "Fundazioaren sortzaile izan ziren Monzon-Ganuzatarren asmoa osoki betetzen da; hain zuzen, Lacombe artxiboa euskal herritarren esku jartzea".
