Udalak "askotan" adierazi izan du gaur egungo azpiestazioa lekuz aldatzeko beharra, erdigunean dagoelako, eta horretarako permuta egitea onartu zen, aho batez, 2020ko azaroaren 30eko osoko bilkuran; permuta 2022ko otsailaren 9an sinatu zen. Hala, Udalak Txara baserriaren inguruan duen 3.381 metro koadroko partzela eman dio Iberdrolari eta Iberdrolak hilerriko azpiestazioa kendu eta gunea urbanizatuko du. Proiektuak 5.000 metro koadro baino gutxiago hartzen dituenez, ez du plan berezi baten beharrik. Hori bai, ingurumen-inpaktua murrizteko neurriak jarri ditu Udalak; azpiegitura bukatu ostean, hiru hilabete izango ditu Iberdrolak erdiguneko azpiegitura kentzeko.