Martxoaren 8aren egitarauaren barruan klasiko bihurtu da Aroztegi aretoko herriko emakume artisten erakusketa. Aurtengoa zazpigarrena da dagoeneko eta Emakumea eta hitza izena jarri diote. "Artista bakoitzak testu bat jarriko dio artelan bakoitzari, artelanarekin zerikusia izan daitekeena edo ez. Artista bakoitzak erabaki du zer eta nola jarri. Horrez gain, hitza eta artea nolabait lotzeko, bi txoko ere egokitu ditugu Aroztegin: idazlearen txokoa eta margolariarena", adierazi du erakusketako artistetako batek, Justina Elexpuruk.
Aurten, herriko 25 artista
Gaur inauguratuko dute erakusketa (19:30) eta martxoaren 19ra arte bisitatu ahalko da. Margolanak dira gehienak, olioak, akrilikoak eta akuarelak, baina badira bestelako artelanak ere. Aurten ere 20 urtetik 75 urtera arteko artistak batu ditu ekimenak, hainbat belaunaldiren arteko lanketa ahalbidetuz. Herriko 25 artista izan dira aurtengo erakusketan parte hartu dutenak: Alicia Garcia, Mariñe Jauregi, Ana Abajo, Arantzazu Arregi, Cecilia Dulanto, Maialen Lopez, Espe, Idoia Etxarri, Justina Elexpuru, Kontxi Idigoras, Maite Azkargorta, Maria Cruz Andueza, Mari Karmen Laskurain, Mireia Gonzalez, Nekane Bernal, Nerea Kerejeta, Usoa Mendikute, Zu-Frida, Amaia Santamaria, Maddi Martin, Marilu Unzurraga, Lierni Narbaiza, Itziar Murgizu, Mari Paz Alustiza eta Ione Telleria.
Ohiko ordutegia izango dute
Erakusketak ohiko ordutegia izango du: martitzenetik egubakoitzera 18:00etatik 20:30era egongo da zabalik; zapatuetan 12:00etatik 14:00etara eta 18:00etatik 20:30era; eta domeketan 12:00etatik 14:00etara. "Eskerrik asko artista guztiei eta beste urtebetez proiektu polit hau aurrera ateratzea posible egin duzuenoi", diote antolatzaileek.
Iaz, omenaldia emakume baserritarrei
Pandemiako neurriak indarrean zirela egin zen iazko erakusketa, Bertatik bertara, emakume baserritarren bizitza izenburu izan zuena. Emakume baserritarrek omendu nahi izan zituzten emakume artisten kolektiboak eta Martxanterak talde feministak, eta margolanek, zeramika lanek eta ikus-entzunezkoek osatu zuten, besteak beste. Ikusmin handia piztu zuen erakusketak.
