Otsailaren 13an izango da Torturaren Aurkako Eguna eta horren harira, bi ekimen antolatu ditu Gure Artera taldeak, Itziarren seme-alabak Torturari begira lelopean: alde batetik, Bi arnas dokumentalaren emanaldia egingo dute, hilaren 14an, arratsaldeko zazpietan, Seminarixoan. Ondoren, solasaldia izango da ikus-entzunezkoaren egile Imanol Arzuaga Kima-rekin eta atxiloaldian Guardia Zibilak bortxatu egin zuela salatu zuen eta erbestean 15 urte bizi izan den Nekane Txapartegirekin.
Bestalde, Olaso Dorrea Fundazioarekin batera hitzaldia egingo dute Iñigo Elkorok eta Joxe Aldasorok otsailaren 16an, arratsaldeko zazpietan, Olaso Dorrean bertan. Elkoro Torturaren Aurkako taldeko abokatua izandakoa da eta torturaren erabilpen politikoaren bueltan hitz egingo du; Aldasorok, berriz, lana aurkezteaz gain, gaiaren gaineko iritzia eman eta irakurketa laburra egingo du.