Diziplina askotariko hainbat lagunek –aktoreak, zuzendariak, argi eta soinu teknikariak, musikariak, diseinatzaileak, txotxongiloen manipulatzaileak...– osatzen duten taldea da Mar-mar Teatro. "Talde-sorkuntzan sinesten dugu antzerki-ikuskizunak sortzeko oinarri gisa. Horrela ulertzen dugu antzerkia eta horrela bizi dugu", diote taldekoek.
Familiei zuzendutako Tarzan lana eskaintzen ibili dira orain artean eta aurreko asteburuan Berrizen estreinatu zuten Arrainak bihotzean izenekoa taularatuko dute bihar Seminarixoan.
Aktoreak eta txotxongiloak
Taularen gainean izango diren Irene Hernando, Aritza Rodriguez eta Maitane Serrano aktoreek Martaren istorioa kontatuko dute txotxongiloak eta bestelako osagaiak erabilita. "Martak ez daki non bizi diren beldurrak, eta lasai bizi da herri polit batean. Marinela du aita eta portuan zain duen egun gris batean, ekaitz batek uretara botako du eta itsas hondoak behartutako bidaia bat hasiko du".