Zubieta eta Masterreka kaleak urbanizatzeko lanen hirugarren faseari ekingo diote datorren astelehenean. Lehen esku-hartzeak Masterrekan egingo dituzte eta hurrengoak Bideberriko bidegurutzean, sei hilabeteko epean. Horrenbestez, ibilgailuek bide alternatiboa hartu beharko dute. Espoloia-Bidekurutzeta-San Pedro-Artekalea kaleetatik sartu eta Barrenkalea-Irizar-Kruz Gailastegitik irten beharko dute 18 tonatik beherako ibilgailuek –astunagoek baimen berezia beharko dute–. Ondorioz, Multzo Monumentaleko kale horietako ostalaritzako terrazetan ere eragingo du zirkulazio aldaketak.
Lanek iraun artean, oinezkoek Masterreka kaleko espaloi-alboetatik izango dute pasabidea eta Udala horien joan-etorriak egokitzen joango da. Garajeen sarbideak lanak egiteko eten beharko direnean, aurretik jakinaraziko zaie erabiltzaileei. Kexak eta oharrak udaletxeko Bulego Teknikora bideratu ahalko dira; eta kontratistak bulegoa du Masterreka 16an.