Toti Martinez de Lezearen Bretxa eleberri historikoan oinarritutako formatu handiko musikala da Bergara Antzerki Musikala (BAM!) elkarteak egin duena, eta estreinaldirako hilabete baino gutxiago faltan, "pozik" daude publikoaren harrerarekin, dagoeneko Donostiako hiru emanaldietako sarrerak agortu egin dira eta. "Gure aurreikuspen guztiak gainditu ditugu, ez genuen halako erantzunik espero. Jende piloa geratu da sarrera erosi ezinik", dio Zuzendari eszeniko Valen Moñuxek. Partaide hartuko duten ikasle guztien ametsa bete dela gaineratu du kontatu du Bergarako Musika Eskolako zuzendari Marije Ugaldek: "Victoria Eugenia bezalako antzoki garrantzitsu bat beteta ikusiko dute hiru emanaldietan".
Musikalaren egile eta zuzendari Oihan Vegak ere eskerak eman dizkie Donostiako emanaldietarako sarrerak erosi dituztenei eta Bergarako emanaldirako gonbidapena egin du: "Gabon garaietarako opari aproposa da musikalerako sarrerak erregalatzea. Beti asmatuko duzu opari horrekin eta herriko kultura sustatuko duzu aldi berean. Emanaldi berezia izango da hori ere guretzat, gure jendearen aurrean eskainiko dugu eta".
Victoria Eugeniara autobusa, Bergaratik
Bergarako Udalak autobusa antolatu du emanaldi guztietarako; Seminarixoa.eus atarian edo Seminarixoko leihatilan eskura daitezke txartelak, bi eurotan. Autobuseko txartela eta Victoria Eugeniako sarrerak erakutsi beharko zaizkio gidariari aurobusera igotzeko orduan.