Aranzadi ikastolak gaztaina erreak eta elkartasun hostoak salduko ditu Lapurdiko Ametza Ikastolaren alde, egubakoitzean, hilak 16, arratsaldeko bostetatik zortzietara, frontoian eta Irala kalean.
Salmenta honekin, duela aste batzuk Arizmendi ikastolak martxan jarritako egitasmoari jarraipena eman nahi dio Aranzadik eta badute erronka: batutako diruarekin iparraldeko ikastolako berogailua bi gradu igotzea. Izan ere, ekintza berarekin Arrasaten, Aretxabaletan eta Eskoriatzan guztira 5.333 euro bildu zituzten eta jasotako dirua Ametza Ikastolako berogailua jartzeko bideratu zuten.
Auzolan honetarako prestaketa lanetan dago murgilduta Aranzadi. Ikastolatik adierazi dutenez, umeak dagoeneko elkartasun hostoak egiten ari dira eta zaharrak gaztainak pikatu nahiz horiek banatzeko kukurutxoak egiten.