Sanmartinetako zapatuan txosna beranduegi itxi izanak, Xaxauren arabera, 1.000 eurotik gorako kalte ekonomikoak eragin dizkie: "Mozal Legean jasotako arau-hauste larritzat jo dute, horrek dakartzan albo-ondorio eta kalte guztiekin. Lege horrek eskubide zibilak eta oinarrizko eskubideak urratzen ditu, poliziari botere osoa emanez. Izan ere, legeak poliziari ematen dio eskumena isuna jartzeko, epaileen esku-hartzerik gabe".
Horrez gain, gogora ekarri dute "herritik eta herriarendako" ekintzak antolatzen dituztela, eta gaineratu dute: "Izan Pentekosteetan edo izan sanmartinetan, aurten ere hori egiten saiatu gara, denontzat egitaraua antolatu eta txosnak ahalik eta luzaroen zabalik mantentzen. Horrek espero ez genituen ondorioak ekarri dizkigu. Bide hori irekita, Bergarako eragile sozial eta herritar guztiei ohartarazpena bidaltzen zaie, euren jarduera eta ekimena mugatu eta oztopatu nahian".
Udal Gobernua: "Lege honek halako gertaerak ahalbidetzen ditu"
Gertaeraren inguruan egiten duten irakurketaz galdetuta, Udal Gobernuak "Mozal Legea" delakoaren kontra dagoela argitu nahi izan du: "Lege horrek herritarren eskubideak murrizten ditu, ez dugu lege hori babesten. Lege honek halako gertaerak ahalbidetzen ditu".
