Hamarkada bat baino gehiago darama Hondakinen Prebentziorako Europako Astea kudeatzeko idazkaritza teknikoan Ihobek. Eusko Jaurlaritzako Ingurumen Jarduketarako sozietate publikoa da. Europako ekimenean, urtero banatzen dituzte sariak, eta aurten, Bergarako Laboratorium Museoa izango da Arabako, Bizkaiko eta Gipuzkoako hautagaietako bat.
Hain justu, Hondakin jasangarriak: fikzioa ala errealitatea? erakusketa dago oinarrian, eta hautagaitza hori ziurtatzen duen diploma jaso zuen Rosa Errazkin Laboratoriumeko arduradunak azaroaren 24an, Irungo Ficoba erakustazokan eginiko Basque Circular Summit 2022 jardunaldietan.
Ekimen osagarriak
Are gehiago, Laboratoriumeko kideek jakinarazi dute erakusketa horrek beste ekimen osagarri batzuk ere eragin dituela; besteak beste, ehungintza jasangarriaren inguruan egindako ekitaldia eta moda erakustaldia. "Ildo horretan, konpromisoak ere hartu ditu museoak, eta dendan eskaintzen dituen produktuak jasangarriak izango dira aurrerantzean".