Bergarako Harria talde berriak diskoa kaleratu du, "barrura begiratzetik"

Harria taldea: Maitane Azkarate, Aitor Aldanondo, Guille Sanz eta Ekaitz Aranberri. (Argazkia: Harria).

Harria taldeak ikusmina piztu du kaleratu berri duen diskoarekin; Durangoko Azokan Ekinez-en standean egongo dira. Iker Barandiaran musika adituaren arabera, aberatsa da diskoa: "Hamabi kantu batzen dituen estreinako lan honek asko du barrura begiratzetik, sufritzetik, lanketatik, lorpenetatik zein garapen eta moldaketa aberatsetatik".

Diskoan "bizipen sendoak" pilatu ditu taldearen "inspiratzaile, sortzaile eta gidari" den Aitor Aldanondok, Barandiaranen arabera: "Harria-ren inspiratzaile, sortzaile eta gidari den Aitor Aldanondo bergararrak bizipen sendoak pilatu ditu musikan zein bestelakoetan. Brigada Criminal taldea desegin zutenetik punk-rocka alboratuta dauka, eta ez da kasualitatea, ez, gerora, besteak beste, Fiachras zein Bizardunak-en gisako taldeetan aritu izana; hain zuzen ere, poseetatik harago rockaren (eta zergatik ez, folkaren) sustraietara jo izana".

Eta hala gaineratu du Barandiaranek: "Orain, bestelako bizitza prozesutan murgilduta, barrurago begiratu du eta gertukoek –Maitane, Ekaitz eta Guille- lagunduta, honako proiektua sortu du; are gehiago, Ekaitzek Erantzun bat eta Ainubean kantuak idatzi ditu. Ariketa sakona da diskoa garbiketan, hitzetan eta musikan; eta, gainera, kantuak borobiltzeko kolaborazio zehatzak batu ditu".

Honako kide hauek osatzen dute Harria: Belceblues eta What A Band (WAB) taldeko kide izandako Guille Sanz (bateria), Bidelapurrak-eko Ekaitz Aranberri (gitarra eta ahotsa); Brigada Criminal, Fiachras, Bizardunak eta WABeko kide izandako Aitor Aldanondo (ahotsa); eta Maitane Azkarate (ahotsa).

Bergaran, Amua arropa dendan eta Aldoka Maldoka (Popis) eta Arrano tabernetan dago salgai. "Asmoa da otsailetik aurrera zuzenean aurkeztea", diote. Argibide gehiago, taldearen instagram kontuan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.