Azaroaren 25a Indarkeria Matxistaren Aurkako Nazioarteko Eguna da. Hori dela eta, "indarkeria instituzional guztiei" aurre egiteko asmoz, kale-ekintza bat antolatu du Bergarako Martxanterak taldeak.
Hain zuzen, 19:00etatik 19:30era izango da, San Martin plazan. Beste urte batzuetan egin den moduan, aurten ere espazio publikoa hartu eta ekintza politiko-artistiko bat egingo dute. Herritarrek ere parte hartu ahal izango dute.
Bailarako mugimendu feministako kolektiboekin batera adostutako gaia izango da ardatz: indarkeria instituzionala. Suaren sinbolismoa eta potentzialtasuna lagun, "sistema patriarkal, arrazista eta kapitalistan sostengatzen diren instituzioen indarkeriak seinalatuko dira". Era berean, jasaten dituzten indarkeria horiei aurre egiteko antolakuntzaren eta elkar-babesaren beharra azpimarratuko dute, beste behin. Aurtengo kale-ekintza Candem Dance eskolako dantza talde baten ikuskizunarekin amaituko dute.
