Urte batzuk pasata, Bolintxo Okidengia-Lana E. Koop. taldeko txirrindulariak berriz ere lokatzetara itzuli dira. Pandemiaren garaiko urteetan ezin izan dira ziklo-krosean lehiatu, eta asteburu honetan izan da taldearen berragerpena.
Denboraldia urrian hasi zen arren, Lokatza Ziklismo Eskolak txirrindularien heziketa prozesuan pausoz pauso jardun du. Horregatik, asteburu honetan Lezamako lasterketan egin dute debuta eta Unai Ormaetxea aramaioarra izan da parte hartzailea, lehen urteko kadete gisa. Lokatza izan dute, egindako euriaren ondorioz, eta Lezamako zirkuituari hiru itzuli eman behar izan dizkiote txirrindulari gazteek. Ormaetxearen esanetan, lasterketa gogorra izan da zirkuituaren egoeragatik, baina, hala ere, gogotsu bukatu du, hurrengo lasterketa noiz izango den galdezka.
Era berean, errepideko denboraldi berriari begira talde osoa hasi da neguko prestaketarekin, eta mendia, gimnasioa eta bizikleta uztartzen dihardute.