Astelehenero 20:00etatik 21:00etara Txapa Irratian entzun daitekeen Haus of beats saioak zazpi urte bete dituela eta, musika elektronikoak hartu zuen atzo Bergarako Kartzela Zaharra. “Hasiera batean bosgarren urteurrena ospatzeko asmoa genuen, baina pandemia etorri zen, eta…”, dio irratsaioan parte hartzen duen Asier Balztategi, Balzak.
Eta horretarako, bi zati nabarmen izan zituen festa antolatu zuten atzorako. Arratsaldean, Massa Confusa donostiarraren eta Amsia azkoitiarraren –bigarrena, bideoan– emanaldiak izan ziren, antolatzaileen esanetan, “musika esperimentalagoa”. Gero etorri zen “klub gauan”, bestalde A-Tweed italiarrak eta irratsaioa egiten duten hiru kideak, hau da, Balza bera, Keep_a eta Budak jarri zuten musika.
Festak, jende kopuru aldetik, erantzun ona izan zuela diote antolatzaileek: “Arratsaldean musika esperimentala eta arriskutsuagoa izanda eta Bergaran kintada asko zeudela ikusita, uste baino jende gehiago etorri zen. Gauean aldiz, espero baino gutxixeago. Jende kopuru aldetik, bikaina izan da”. Zazpigarren urteurrena ospatuta ere, saioarekin jarraitzeko asmoa adierazi dute Haus of beats-ekoek.
