Bergarako kultur sorkuntza, oro har, aberatsa da, eta musika arloa ez da salbuespena. Musika talde asko daude herrian une honetan, eta Bergarako Udalak herriko musika taldeen disko bat grabatu nahi du. Herritarren batzordeko lehendakari Ekaitz Aranberriren esanetan: "Talde pila bat daude, mugimendua dago une honetan, eta hori etorkizunerako gorde nahiko genuke". Lan berriak sortzeko bultzada ematea ere badu helburu ekimenak. Aranberrik gaineratu duenez, diskoa grabatzeko proposamen honek "talde hasiberriek estudioa ezagut dezaten lagunduko du; zelan egiten den lan, esperientzia hartzea... Gainera, aurkezpen modura erabili ahal izango dute grabatutako kantua”.
Antolatzen hasi ahal izateko, Udalak jakin nahi du zenbat talde egongo liratekeen prest, eta, horretarako, galdetegia betetzeko eskatu die interesa izan dezaketen musika talde zein bakarlari hasiberriei, azaroaren 27a baino lehen. Galdetegia betez interesa agertzeak ez ditu taldeak lotuko abestia grabatzera; lehen pauso horrekin, Udalaren asmoa da musikariek duten interesa ezagutzea. Talde edo bakarlari bakoitzeko kanta bat grabatuko da.
Hauek dira parte hartuko duten taldeek hasiera batean bete beharreko baldintzak –aldaketak egon daitezke ekimena garatzeko orduan–:
- Grabatuko den abestiak originala izan beharko du eta aurretik argitaratu gabea.
- Musika taldeak gaur egun martxan egon beharko du –kontzertuak ematen edo entseatzen, abestiak egiten...–.
- Abestien hitzak ez dira izango kolektibo zaurgarri edo norbanakoentzat iraingarriak.
- Grabazio estudioak ezarritako baldintzak bete beharko dira: adostutako ordutegiak errespetatu, beharrezko materiala eraman...
- Taldeek behar besteko profesionaltasuna eta prestutasuna adierazi beharko dute grabazioa egiteko –abestia ondo prestatuta eraman, taldekideen asistentzia bermatzeko grabazio ordutegietara moldatzen saiatu...–.
- Taldekideen erdiek, gutxienez, bergararrak izan beharko dute.
