UNED Bergarak hasiera emango dio ikasturteari egubakoitzean

2021-2022 ikasturte akademikoaren irekiera ekitaldia, iaz, Bergarako Udaleko osoko bilkuraren aretoan.

Udaletxean egingo dute ekitaldia; zentroko arduradunez gain, Gorka Artola eta Markel Olano ere izango dira. 19:00etan izango da.

Bergarako UNEDek hasiera emango dio 2022-2023ko ikasturte akademikoari ofizialki egubakoitzean, azaroaren 18an. Horretarako, ohi den moduan, ekitaldi bat egingo dute udaletxeko osoko bilkuraren aretoan. Arratsaldeko zazpietan izango da, eta bertaratzeko gonbidapena egin dute zentroko arduradunek.

Hitzartzeek osatuko dute ekitaldia, eta, hasiera emateko, antolatzaileek jakinarazi dutenez, Gorka Artola Bergarako alkateak hartuko du lehendabizi hitza eta, Iñaki Esparzaren txanda izango da ondoren, UNED Bergarako zuzendariarena. Haren atzetik, berriz, Juan Jose Alvarez UNEDeko irakasleak hitz egingo du.

Dena den, hitzartzea ezberdina izango da, gai zehatz baten inguruan jardungo baita. Hain justu, Formación y buena gobernanza: antídotos frente al caos geopolítico hitzaldia egingo du (Prestakuntza eta gobernantza ona: antidotoak anabasa geopolitikoaren aurrean).

Diploma banaketa

Are gehiago, aurreko ikasturtean graduatutako ikasleen diploma banaketa ere egingo dute ekitaldian, eta, horren ostean, agintariek hartuko dute hitza: besteak beste, Markel Olano Gipuzkoako diputatu nagusiak, UNED Bergarako patronatuko lehendakaria baita. Eta azkenik, Ricardo Mairal zentroko errektorearen txanda izango da, hitzartzeei bukaera emanez. Amaitzeko, eta ekitaldia borobiltzeko asmoz, Bergarako Musika Eskolako hari taldeak emanaldia egingo du bertaratuentzako.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.