Azaroaren 3tik 6ra hartuko du Bergarak Taun Taun Teatroak antolatzen duen Helduentzako Nazioarteko Txotxongiloen Mostra. San Martin plazan, Seminarioan eta Munibe plazan erakutsiko dituzte lanak Euskal Herriko zenbait herritatik nahiz Kataluniatik, Argentinatik, Mexikotik eta Uruguaitik etorritako artistek.
San Martin plazan egingo da inaugurazioa, azaroaren 3an, eta, ondoren, Trabajos de interior lanaz gozatu ahal izango da. 4an, berriz, Andante maskara-antzerkia eta Mierda de ciudad lanak eskainiko dituzte. Zapatuan, Pasos largos, Libèlul.la eta The Strambotik Kabaret. Azken bi horiek 6an errepikatuko dituzte, Trashhh eta Anima, Animae, Animan laburrarekin batera.
Halaber, Taun Taunek instalazioa jarriko du udaletxeko osoko bilkuren aretoan lau egunetan. Bisitariek ezusteko objektuak manipulatuko dituzte, esperimentatu eta jolastu: 3tik 5era, 18:00etatik 19:00etara; eta 6an, 11:00etatik 12:30era eta 17:00etatik 19:00etara.
