Glu-glu konpainiaren Munduari bira 80 egunetan antzerki-ikuskizuna izango da ikusgai bihar, arratsaldeko seietan, Seminarixoan. Sarrerak lau euroren truke eros daitezke www.seminarixoa.eus webgunean.
Andrea Covadongak, Jon Casamayorrek, Sara Barroetak eta Leire Ormazabalek taularatuko dute Jules Vernek idatzitako izen bereko liburuan ardatz hartu duen antzezlana. Abenturako istorio bat da, modu komiko eta musikalean kontatua.
Ordubeteko bidaia
Liburua errealitatera egokitu dute. Izeba-osabak eta bi iloba dira protagonistak, eta ipuina ozen irakurtzen amaitzen dutenean hasiko da antzerkia; iloben iritzi,z ez dago munduan zehar bidaiatu beharrik jatorri eta arraza askotariko pertsonak ezagutzeko, egunerokotasunean mundu osoko pertsonekin egiten baitute topo.
Hortik aurrera, osaba-izeben etxeko ganbaratik atera gabe, herrian buelta bat ematen dutela irudikatuko dute, ordubetez, hainbat jatorritako pertsonak eta egoerak birsortuz. Hortaz, eleberriko eszena mitikoak emulatuko dituzte eta pertsonaia berriak sortu dituzte garapen dramatikoa eraikitzeko.
Abestiak eta dantzak obran murgiltzeko gakoak dira. Gainera, zirkuko elementuek leku exotikoak nahiz garraiobideak irudikatuko dituzte, hala nola itsasontziak, trenak eta globoa.
Lanaren helburua da ikuslea abenturan murgiltzea eta parte aktibo izatea. Antzerki taldetik aurreratu dutenez, leku askotako giroa biziko dute ikusleek, baita soinuek igorritako emozioak sentitu ere.