Bi urteko etenaldiaren ostean, Antxintxika triatloi taldeak jakinarazi du azaroaren 5ean, zapatu arratsaldean, egingo dela Soraluze eta Bergara arteko Antxintxika lasterketa. XVI. edizioa da, eta Mikel Crespo eta Oliver Hernandez taldekide izandakoak omentzeko baliatuko dute.
10 kilometro ditu ibilbideak, eta irteera gunera autobusean joateko aukera egongo da. Helmuga, berriz, Irala kalean izango da. Ordutegiari dagokionez, 16:30ean irtengo dira hand bike-ak eta gurpildun aulkiak. 16:45ean patinak eta 17:00etan korrikalariak.
Bestetik, azkenengo urtean, lehen aldiz, desgaitasun fisiko eta psikikoak zituzten umeek parte hartzeko aukera izan zuten. Aurten ere egongo da aukera, baina horretarako –ibilbidean zehar aulkiak bultzatzeko– boluntarioak behar dituztela azaldu dute elkartekoek: 688 63 51 53 telefonora deitu behar dute interesa dutenek.
Izen-ematea, zabalik
400 parte-hartzailerentzako lekua dago, eta webgunean eman behar da izena. "Martxa onean doa izen-ematea", adierazi dute.