Urriaren 5ean, goizeko hamaiketan egingo da San Joxepeko ortu komunitarioak esleitzeko zozketa udaletxean. Guztira 80 eskaera aurkeztu dira, eta, behin-behinean, 75 onartu dira. Udalak adierazi duenez, beste bostak baztertuak izan dira deialdiko baldintzak betetzen ez zituztelako edo dokumentazioa falta zitzaielako. Hala ere, erreklamazioa aurkezteko aukera dute.
Guztira, 30 eta 50 metro koadroko 96 lursail aterako dira zozketara; hortaz, onuradunei zein zati egokitu zaien jakiteko izango da zozketa. Udaletik aurreratu dutenez, behin zozketa eginda epez kanpo jaso diren eskaerak tramitatzen hasiko dira, jaso diren ordenean; eta lurrak epez kanpoko eskaeren hurrenkeran esleituko dira, betiere baldintza betetzen badituzte.
Halaber, ortuak erabiltzen hasi aurretik lau orduko ikastaroa egin beharko dute onuradunek.