Ekintzailetasuna sustatzeko egitasmo berria eskainiko du Bergarako Udalak datorren ikasturtetik aurrera. Udalak azaldu duenez, "haien kabuz lanean ari diren pertsona ekintzaileak lanerako espazio faltan egoten dira maiz". Ondorioz, behar horri erantzuteko zabalduko dute gunea. UNED-Bergararekin sinatutako akordioari esker, UNEDek utzitako gela bat jarriko du herritarren zerbitzura. Asmoa da urrian jartzea martxan. Irailean zabalduko da eskaerak aurkezteko epea eta Bergaran eta Debagoienean erroldatutako ekintzaileek egin ahal izango dute eskaera.
Bertako ekintzaileei lanerako espazio partekatua eskaini nahi zaie, "lankidetzako ekonomia ereduan oinarrituta, sinergiak sortu, elkarrekin ikasi, harremanak sustatu eta proiektuak nahiz ezagutzak partekatzeko".
