Uztailean zehar musika doinuek girotuko dute Usondo parkea, guztira bost emanaldi antolatu baititu Bergarako Udalak. Bihar, 22:00etan, emango zaio hasiera egitasmoari, Pelaxen kontzertuarekin. Uztailaren 5ean, 20:00etan, Ertzak talde bergararren txanda izango da. Uztailaren 10ean jarraituko du egitasmoak, Potx eta Lotx pailazoekin, hilaren 14an Liher taldearen emanaldiarekin, eta, emanaldiak borobiltzeko, La Furia abeslaria igoko da Usondoko oholtzara, uztailaren 28an.
Aldaketekin dator Ertzak
Bergaran izatea berezia dela azpimarratu du Oihane Vicente abeslariak, "aspaldi bertan jo gabe" daudelako. Musikari eta dantzarietan aldaketak egon badira ere, ohi modura bederatzi lagun izango dira oholtzan. Sei musikariren hainbat abesti dantzatuko dituzte Anderrek eta Garazik, eta, aldi berean, Josu Maroto margolariak egingo ditu ilustrazioak. Abestiei dagokienez, Bergaran sekula jo ez duten Zoratzen kantua joko dute eta bertsioak nahiz sorpresak egongo direla aurreratu du Vicentek.
