Gure platera, gure aukera ekimenaren barruan egin duten topaketan, adierazi dute maila instituzionalean urratsak oso ahulak direla, araudi eredu osagarria definitzeko beharra dagoela eta, besteak beste, begiraleen lan hezitzailearen aitortza aldarrikatu dute.
Ikastetxeetan sukaldeak izatearen garrantzia nabarmendu dute, "Produktu fresko eta kalitatezkoak menuan txertatzeko ezinbestekoak direlako sukaldeak". Hala, tokiko administrazio eta erakundeekin baterako gobernantza eskatu dute. "Jangelen eremuan aurrerapausoak emateko, ezinbestekoa da eragile sozial eta instituzionalen arteko elkarlana eta baliabideak bermatzea", eta gaineratu dute posible dela, baina borondate politikoa falta dela. "Europa eta Estatuan aztertu diren eta EAEn garatu diren lau esperientzia pilotuek erakutsi dute beste kudeaketa eredu bat posible dela eta bideragarria dela. Hezkuntza eremutik haratago, lehen sektoreko eragile ezberdinek ere azpimarra berezia jarri dute jangelen eremuan, are gehiago egungo menpekotasun eta krisi testuinguruan. Elikadura-katean gertatzen ari diren askotariko korapiloei heltzeko motore izan daitezke jangelak".