Eguenean hasiko da Bidegi A-636 autobideko 0 eta 5,2 kilometroen arteko zoruaren birgaitze lanen lehen fasearekin. Zehazki, eguen zein egubakoitzean zoruaren laginak hartuko dituzte Beasain eta Ormaiztegi arteko errepide zatian, Gipuzkoako Foru Aldundiak ohar bidez adierazi duenez, "errodadurako eta tarteko geruzen egoera ezagutu, eta autobideko zati bakoitzean egin beharreko jarduketak zehazteko".
Uztailaren 4an hasiko dira Ormaiztegin zoruaren fresaketa lanak, eta zazpi hilabetez arituko dira Beasainerainoko "autobiaren enborra, bi noranzkoetan, erabat" berritu arte. BEZik gabe, 4.117.295 €-ko aurrekontua du proiektuak, eta Bidegik "autobiaren erabiltzaileek sortutako funtsekin egingo dio aurre inbertsioari".
Ondorioak erabiltzaileengan
Autobidearen bailarako tartean obrarik egingo ez den arren, ondorioak izango ditu errepidea erabiltzen duten debagoiendarrengan. Eguen eta egubakoitzean, esaterako, hainbat errepide zati egongo dira itxita Ormaiztegi eta Beasain artean, Aldundiak errei bat beti irekita egongo dela baieztatu duen arren.
Horrez gain, A-636 autobidean dauden bi zerbitzuguneak ere itxiko dituzte datozen asteetan –data ez dute zehaztu–, eta 3,5 metrotik gorako zabalera duten garraio bereziek ezin izango dute errepide hau erabili.