Triatloi Txikiak seigarren edizioa izan du gaurkoan, eta hasierako helburua ez da aldatu: "Antxintxikaren filosofia beti da Debagoienean triatloia bultzatzea, eta gaurko saioa ere horretarako egin dugu, nahiz eta Gasteizetik eta Durangotik ere etorri diren", azaldu du Nielka Ibarguren Antxintxikako kideak. "Espero dugu etorkizunean gure taldera batzeko balio izatea batzuei, azken batean, horretarako egiten baitugu lan".
Hasieran ezkor zeuden arren, azken momentuan asko hazi da izen-ematea eta 75 haur eta gazte aritu dira gaur triatloia probatzen. Hori dela eta, Antxintxikako kideak "oso pozik" geratu dira saioak emandakoarekin.
Atzeko lan handia eskatzen du triatloi bat antolatzeak, eta gaur agerian geratu da hori. "Triatloi Txikia antolatzen lau bat kide aritu gara, baina gaurkoan talde osoaren beharra eduki dugu. Izan ere, laguntza behar da, gauza asko hartu behar baitira kontuan: igerilekua, boxa, bizikletak eta abar".
Hiru kategoriatan aritu dira
Emaitzei dagokienez, benjaminek lasterketa neutralizatua egin dute, eta ez da sailkapenik egon.
Alebin mailan, nesketan, Maier Miota nagusitu da. Bigarren sailkatua Naiara Saenz de Jauregi izan da eta hirugarrena, berriz, Garazi Alzola. Mutiletan, Peru Mondragonek irabazi du proba, Enzo Elizbururen eta Xabi Galdosen aurretik.
Erreleboetan, bestalde, Aupa Erreala taldea izan da irabazlea (Uxuea, Ane eta Nagore); bigarren sailkatua Aupa Gu taldea (Unax, Markel eta Aner) eta hirugarrena, Triatletak LH6 taldea (Aizea June eta Pagoa).
Infantil mailan, bestalde, Julen Rodriguezek irabazi du proba, Ane Alberdi sailkatu da bigarren eta Unai Rementeria, hirugarren.
