"Oso gogor hasi dut partidua, pilotari gogor ematen eta tantoak bukatzen. Hala ere, partidu erditik aurrera, sakearekin min egin dit eta hor egon da gakoa", dio Barrocalek. "Ondo ezagutzen dut Mirianen jokatzeko modua eta banekien oso aurkari gogorra izango zela. Partidu hasieran ondo eutsi diot, baina bukaerarako nekea igarri dut eta tanto asko huts egin ditut". Hori dela eta, "penaz" geratu da, etxean ezin irabazi ahal izanagatik.
Edozelan ere, pozik egoteko moduan da egin duen txapelketarekin. "Partidu gehienak oso ondo jokatu ditut, maila onean aritu naiz, eta finalaurrekoetan ondo aritu nintzen. Finalerako ere motibatuta nengoen, irabazteko aukerekin ikusten nintzen, eta ezin izan den arren, gustura nago egindako txapelketarekin".
Irabazleak ere aitortu du final "zaila" izan dela. "Kosta egin zait partiduan sartzea. Maddik asko jokatzen du eta mendean eduki nau. Horrek harritu egin nau, normalean nik menderatzen ditudalako aurkariak. Hala ere, gero partiduari buelta ematea lortu dut".
Federazioko ordezkaririk ez
Gipuzkoako Euskal Pilota Federazioak antolatutako txapelketa izan da eta federazioko ordezkaririk ez da egon finalean. Hala, Bergara Kirol Elkarteko Pilota Saileko kideek salatu egin dute jokabide hori, baita bertan egon diren pilota zaleetako batzuek ere.