Ohiko Pentekosteen itzulerarekin batera, bueltan datoz Musika Bandak egiten dituen emanaldiak. Alde batetik, egubakoitzean, Bitorianatxoren jaitsieran, Miguel Gonzalez Bastida zuzendari ohiak sortutako Pobres y alegres martxa joko du; ondoren, kalejiran joango da. Partaide berri askoretzat nahiz Enrike Txurrukarentzat, zuzendari modura, ekitaldi horretan parte hartzen duten aurreneko aldia izango da. Halaber, domekan, kontzertua eskainiko du; Espoloian izango zela iragarrita bazegoen ere Udal pilotalekuan egiteko erabakia hartu dute, euria egiteko aurreikuspenagatik.
'Pobres y alegres'-en sorrera
Martin Gantxegi musikariak, ezizenez Martin Angua-k, doinu bat entzun zuen, eta hasierako esaldia txistuka jardun zuen egun osoan, burutik ezin kenduta. Miguel Gonzalez Bastida orduko bandako zuzendariari kontatu zionean, esaldi horretatik martxa sortuko zuela agindu zion. Martxaren sorrera 1950. urte ingurukoa den arren, Gonzalez Bastidaren seme Alfredo zuzendari hasi zenean, 1987an, hark proposatu zuen martxa hori jaien hasierako martxa moduan. Ordutik hona, urtero jotzen da.
