Alfredo Najeraren omenezko memoriala jokatu dute gaur Agorrosinen eta Ipintzan. Futbol partiduak baino gehiago izan dira; izan ere, gaurko sarreren dirua Fundame fundazioari emango diote –bizkarrezurreko muskulu-atrofia gaixotasuna dutenei laguntzeko fundazioa–.
Partidu onak
Emakumezkoen mailan, senior mailako kategoriako neskak lehiatu dira: Bergarak Elorrioren aurka neurtu ditu indarrak. Lehenengo zatian aurre hartu dute bizkaitarrek: 0-1 eta 0-2 –penalti bidez–, ondoren etxekoen gola iritsi da; bigarren zatian sartu dute Elorrioko jokalariek hirugarren gola.
Gizonezkoetan, gazteen kategoriako taldeak lehiatu dira: Bergarak eta Realak neurtu dituzte indarrak. Partidu parekatua izan da: etxeko jokalariek ondo eutsi diote Realeko jokalarien kategoriari. Bigarren zatian egindako golari esker nagusitu dira donostiarrak: 0-1.
Jokalari onenen garaikurra
Amaieran sari banaketa izan dute. Kategoria bakoitzeko txapeldunak eta txapeldunordeak garaikurra jaso dute. Horrez gain, partidu bakoitzeko jokalari onenak saritu dituzte: emakumezkoetan Malen Arriolak irabazi du garaikurra, eta gizonezkoetan Ibai Arabaolazak, biak ala biak Bergarako jokalariak.