Bergara Eskubaloiak omenaldia egin zion joan zen asteburuan iragan denboraldira arte klubeko harrobiko jokalari izan zen Eider Elorza Sanz eskubaloi jokalariari. "Denboraldi hasieratik Euskadiko gazte mailako selekzioaren deialdietan ohikoa izan da eta lanaren aitortza egin nahi genuen", adierazi dute klubetik. Eskuin alboko bergararra Cartagenan jokatu zen Espainiako autonomia erkidegoen arteko eskubaloi txapelketan izan zen Aste Santuan, eta euskal selekzioko kideekin batera, zilarrezko domina ekarri zuen etxera jubenil nesken kategorian.
Elorzak, gainera, parte-hartze aktiboa izan zuen euskal selekzioaren jokoan –lau gol sartu zituen txapelketa osoan–. Lehen fasean bigarren gelditu ziren, Madrilgo eta Asturiaseko selekzioak garaitu ostean, hirugarren lehian Andaluziaren aurka galduta. Nagusitasunez menperatu zuten Galizia final laurdenetan (35-27), eta Nafarroako selekzioari irabazita lortu zuten finalerako txartela (27-24). Urrearen borrokan, baina, andaluziarrak izan zituzten berriz arerio, eta ezin izan zuten multzokako faseko errebantxa hartu (23-24).
Zilarrezko Mailan
Egun Elgoibarko Sanlo taldean dihardu Elorzak, jubenil mailako Euskal Ligan –Gipuzkoa mailan lehiatzen da Bergarako taldea–. Eta bere kategoriatik harago, senior nesken Zilarrezko Mailan debutatzeko aukera ere izan du Gaurve Asesores Elgoibar taldearekin, estatu mailako bigarren mailan, alegia. Talde horretan dira, besteak beste, Amaia Kortabarria Ezpeleta eta Ainhoa Tatiegi Loidi oñatiarrak.