Garai bateko ohitura berreskuratuz, Soraluzen izango da Bergarako musika banda. Enrike Txurruka zuzendariak azaldu duenez, une honetan, Soraluzen ez dago musika banda egonkorrik, eta, horregatik, ikasleei nahiz herritarrei banda bezalako musika taldeak hurbiltzea da hango musika eskolaren asmoa, "izan ere, hori izan baitaiteke eskolako ikasleentzat helburua, ikasten ari diren musika tresna, halako talde batean jotzera iristea, alegia".
Txurruka, gainera, jaiotzez soraluzetarra da, eta musika hastapenak bertan egin zituen. Ondorioz, "ilusio berezia" egiten dio bere herrian jotzeak. Gainera, domekan bertan estreinatuko duen martxa bat konposatu duela aitortu du. "Nire belaunaldi inguruko askok gogoratuko dituzte oraindik Ines Marirekin ikasitako doinuak. Horietako batean oinarritu naiz martxa sortzeko, nahiz eta gero nire erara moldatu dudan".
Abesti horretaz gain, Georges Bizeten L'Arlessiene suite klasiko bat; Carl Wittrocken Crossroads abestia; Itoitzen bost doinu, euskal pop-rock taldearen doinuetan oinarrituz Txurrukak egin duen moldaketa, eta Kees Vlaken Las playas de Rio doinu brasildarra izango dira entzungai, besteak beste.