DBH4ko ikasleak dira Agiriano, Aierbe eta Balentziaga, eta arropari bigarren bizitza emateari buruzkoa da Josizuk proiektua. Audi Crea lehiaketako hamar proiektu finalisten artean aukeratu dute.
Lehiaketak proposatutako erronka honakoa zen: "Nola berritu iraunkortasunaren arloan, gure gizartearen eta gure planetaren etorkizuna arriskuan ez jartzeko". Orain arteko fase guztiak gainditu ditu Josizuk proiektuak.
Finala ekainean
Finala non jokatuko den jakitera emateko badago ere egunak ipinita daude. Ekainaren 17an aditu talde bat talde finalista guztiekin egongo da ikasleak komunikazio arloan prestatzeko. Hurrengo egunean, ekainaren 18an, talde bakoitzak bere proiektuaren jendaurreko aurkezpena egin beharko du.
Saria ez da nolanahikoa; izan ere, talde irabazleak Silicon Valley-ra bidaia egiteko aukera izango du "proiektua guztiz garatzeko".
Botoa eman daiteke
Epaimahai batek baloratuko ditu proiektu aurkezpen guztiak, eta balorazio horrek behin betiko notaren %80 suposatuko du. Beste %20 boto bidez lor dezakete parte hartzaileek. Hemen eman behar da botoa, eta garrantzitsua da azpimarratzea egunero eman daitezkeela botoak.