Sukaldeko eta ostalaritzako tresneria egiten duen Bergarako Grupo Lacor-Ibili enpresak urteko Gipuzkoako enpresa onenaren saria jaso du gaur Gipuzkoako Bazkundearen eskutik.
"Logistika-azpiegituran inbertitzeko egin duen apustuagatik, produktuaren garapenean duen dinamismoagatik, diseinuagatik eta berrikuntzagatik, merkatuaren eskakizunetara egokitzeagatik edo pandemiak ekarri duen erronkari erantzuteko izan duen gaitasunagatik" eman diote saria.
Egun hirugarren belaunaldia du Lacor-Ibili taldeak eta 80 herrialde baino gehiagotan saltzen ditu produktuak. 2021ean 180 langile inguru zituen eta 75 milioi eurotik gorako fakturazioa izan zuen.
Enpresa Nazioartekotze Saria, berriz, Arrasateko Fagor Electronicak jaso du, enpresak "nazioartekotzen aitzindari izateagatik", 1992an Asian bere lehen ekoizpen-planta martxan jarri zuelako, eta "nazioartekotze-bultzada berrituagatik", azken bi urteetan beste lau herrialdetan ekoizpen-plantak ireki dituelako.
Gipuzkoako Bazkundeak emandako datuen arabera, taldearen fakturazio-bolumena 75 milioi euro ingurukoa izan zen 2021ean, eta pandemiak eragin gabeko goranzko bilakaera-dinamika izan zuen. Salmentak % 35 izan ziren Europan, %40 Asiako kontinentean eta % 25 Amerikan. Aldaketa azkarrean dagoen mundu honetan nazioarteko hedapen bizkorrean izan duen arrakastagatik eman diote saria.
Ekitaldian saritutako beste enpresak dira: Irungo Dinuy, ETE Enpresa Industriala sariarekin, Olaberriko Suministros GAME S.A., Zerbitzu Enpresa sariarekin, eta Donostiako BioTech Foods, Berrikuntza Enpresa sariarekin.
