Irribarrearekin esnatu eta Min gutxiago, bizitza oparoagoa tailerrak antolatu dituzte La Caixaren Gizarte Ekintzak, San Joxepe Elkarteak eta Bergarako Udalak elkarlanean. Osasuna hizpide hartuta, Bergarako pertsona nagusien ohiturak eta sinesmenak lantzea dute helburu.
Martxoaren 28an eta apirilaren 4an eta 25ean egingo dira lehen gaiari dagozkion saioak; atseden onerako ohitura onak ikastea helburu duten tailerrak, hain zuzen. Mina eta adina lotuta dauden sinesmenari aurre egiteko baliagarriak izango diren saioak, aldiz, maiatzaren 2an, 9an, 16an, 23an, 30ean eta ekainaren 13an egingo dira. Bederatzi formakuntzak Boni Laskuraingo jubilatuen etxean egingo dira, 10:00etatik 12:00etara.
Eguenera arte
Martxoaren 10etik dago irekita izen-ematea, eta martxoaren 24an, eguenean, itxiko da. Hala nahi duenak bost aukera ditu horretarako: udaletxeko BAZ zerbitzuan (08:00-15:00) edo jubilatuen etxean (11:00-12:00) jakinaraztea, baz@bergara.eus helbidera idaztea edota 943 77 91 00 zein 943 76 21 40 telefonora deitzea.
