12:00etan udaletxe aurrean hitzordua jarrita, Euskadiko Udalen Elkarteak bost minutuko elkarretaratze isilak deitu zituen gaurko. Eudelek bere webgunean jakinarazi zuenez, mobilizazioen helburua "toki entitateek Errusiak Ukraina inbaditzeari eta horrek eragiten duen sufrimendu eta suntsipenari, eta milioika pertsonen behartutako exodoari uko egitea" zen.
Aretxabaletan, Eskoriatzan eta Arrasaten bat egin dute deialdiarekin; Bergaran, baina, ez da elkarretaratzerik egin. Irune Galarraga EAJko udal taldeko bozeramaileak prentsa ohar bidez adierazi duenez, mobilizazioarekin bat egiteko proposamena luzatu zioten EH Bilduri. Jeltzaleen hitzetan, baina, "EH Bilduk ez du nahi izan". Erabakia "erabat ulertezina" dela salatu dute, "udala osatzen duten alderdi desberdinak bat egin eta elkarrekin ukrainar herriari gure elkartasuna eta babesa eskaintzeko momentua" dela uste baitute.
Eskaera, babesa eta ekimenak
Gaurko elkarretaratzetik harago, ohar bidez Errusiak Ukraina "inbaditzeari" eta eragindako "sufrimenduari", "suntsipenari" eta "eragindako exodoari berehalako amaiera" emateko eskaera egin dute jeltzaleek. Horrez gain, EAJren udal taldeak "erabateko babesa" ematen die Europar Batasunak eta Estatu kideek erabakitako "ekimen eta ekintza guztiei". Azkenik, ukrainar komunitateari laguntzeko "egin beharreko ekimenak" bultzatuko dituela ere gaineratu du Galarragak.
Hona Bergarako EAJren oharra.
