Udalbiltzak martxan jarritako Geuretik Sortuak proiektuaren bekaldiaren baitan sortu den proiektua da, Antzuola, Bergara eta Elgetako Udalen laguntzarekin. Eresia ikuskizunak "eremu publiko eta komunitarioan, doluari espazio sinboliko-estetikoa eskaintzea bilatzen du", herrian bertan heriotzak dakarren minaz era publikoan eta kolektiboan hausnartzeko.
Amaren heriotzaren ondorioz sortutako lana da Zuñigarena, bere ustetan "ezinbestekoak" dira doluak dakarren min eta hutsuneak osatu eta baretzeko espazioak sortzea: "Senide bat galdu dugunean, erritu sozialak modu nahiko azkarrean eta hausnarketarako aukera gutxirekin ematen dira, ibilbide pertsonal eta intimoari eraginez; gerora, min hori, ezinegona edota bestelako prozesu pertsonalak plaza publikotik atera eta eremu bakartira mugatzen dira".
Udalbiltzaren laguntzarekin
Duela urtebete Udalbiltzaren Geuretik Sortuak beka deialdian irabazle izatetik dator Oier Zuñiga artistak sortutako lana: 15.000€ko beka eskuratu eta bidelagun izan ditu Antzuola, Bergara eta Elgetako Udalak. Udalerri horietan egindako sorkuntza egonaldien prozesua urtebetez luzatu da, eta bertan aritu dira ere Belen Cruz eta Eneko Gil, Zuñigaren zuzendaritzapean.