Abenduaren 21ean ekin zioten Zubieder enpresako langileek Zubieta eta Masterreka kaleak berritzeko lanen prestaketari. Urtarrileko bigarren hamabostaldian hasiko diren lanen harira, tipografia altxaerak egin dituzte Zubieta kalean eskuzko erremintak erabiliz, Bergarako Udalak ohar bidez adierazi duenez.
Urtarrilaren 12an hasiko dira obrako okupazioekin; besteak beste, Mugertzako aparkalekuan "10 bat auto" kenduko dira kasetak eta material-bilketarako gunea prestatzeko, baita Zubieta kaleko zubiaren aurretik dauden hainbat aparkaleku libratu ere. Udalaren xedea urtarrilaren 17an errepidea moztu eta lanekin hastea da, lehen fasean Zubietako zubitik Bideberriko bidegurutzeraino doan zatia berrituz.
Bilera irekia
Berritze lanek hainbat albo-ondorio izango dituzte oinezko zein ibilgailuen ohiko joan-etorrian. Horren harira, eta lanen faseak, epeak, espazioen eta aparkalekuen kudeaketa zein zerbitzuen antolaketa azaltzeko, bilera irekia deitu du Bergarako Udalak. Urtarrilaren 10ean, astelehena, egingo da Bergarako Seminarixoan, arratsaldeko 18:00tik aurrera.