Abenduaren 7an hasi eta urtarrilaren 5era arte haurrei zuzendutako ekimenak prestatu dituzte Bergarako Udalak eta herriko hainbat eragilek, bigarren urtez jarrian, COVID-19aren eraginpean. Horregatik ez dute goizeko kalejira ospatuko, nahiz eta jakin "Bergaran goiz hau oso berezia" izaten dela, "ume eta gurasoen artean ohitura handia dagoelako goizean baserritar jantzi eta gabon kantuan irteteko".
Elkarlanean egiten den ekitaldia
Badira urte batzuk Bergarako ikastetxeak, guraso elkarteak eta Udalak abenduaren 24 goizeko Olentzero eta Mari Domingiren kalejira elkarlanean prestatzen dutena. Izan ere, urtero antolaketarako lan talde bat osatzen da, Aranzadi ikastolako, Mariaren Lagundia ikastolako eta San Martin Agirre ikastetxeko irakasle eta gurasoen ordezkariekin, Udal ordezkariak ere tartean daudela: "Aurtengo abenduaren 24a antolatzeari ere horrela ekin zitzaion, bilera bat antolatuz azaroa hasieran. Taldea ilusioz hasi zen lanean, baina, esan bezala, eta une honetako osasun egoera aintzat hartuta, Olentzero eta Mari Domingi iluntzean etorriko dira aurten ere Bergarara", adierazi dute Bergarako Udaletik.
Gehitu dute Gabonetako egitarau guztia COVID-19aren garapenaren eta unean indarrean egongo diren osasun neurrien menpe egongo dela. Ekitaldiak bertan behera uzten badira, www.bergara.eus webgunean jakinaraziko dute.
Azpian, Gabonak Bergaran egitaraua PDFan.
